Durmuş öwrümi

Berseler elime ýyllaryň çarhyn,
Aýlardym yzyna bir gez dünýäni.
Bilerdim durmuşyň gadryny, parhyn,
Tanardym men kim üstümden gülýäni.

Aldansam biwepa söýgüni bilmän,
Saklardym wadamy hiç oňa bermän,
Eger geçmişime dolanan bolsam,
Söýerdim, ýürekden meni söýýäni.

Bilsedim dostumyň ne hal boljagyn,
Duýsadym ýüzüme ýalan güljegin,
Aňsadym kyn günde taşlap gitjegin,
Dost tutardym düýnki maňa duşmany.

Eger durmuşymda ýeke galaýsam,
Ýa-da ýalňyzlykdan sessiz aglaýsam,
Şu ýolumda ýalňyş ugra ýöräýsem,
Soraglardym ýoly-yzy bilýäni.

Rahymberdi
Suhanow