Kadyr jepbar,senden dilegim kändir,
Sen meni namarda mätäç eýleme.
Hazynaňdan bergil meniň ryzkymy,
Bendäňi bendäňe mätäç eýleme.

Azaşdyrma dogry ýolum egrige,
Egrini deňleme hergiz dogryga.
Kişi maly nesip etmez ogryga,
Halaly harama mätäç eýleme.

Namart köprüsinden ölsem geçmez men,
Kerwen bolsam,halal işden gaçmaz men.
Elinden bir käse şerap içmez men,
Sag eli sol ele mätäç eýleme.

Ýagşy niýet senden dilegim köpdir,
Ajy sözler dilden çykan bir okdyr.
Doganyň dogana bahasy yokdyr,
Agany inige mätäç eýleme.

Magtymguly hakdan dile baryny ,
Dilär bolsaň dile öz imanyňy.
Abat eýle iki gözüm nuryny,
Sag gözi sol göze mätäç eýleme.