Howa şertleri El-Ninýo tebigy hadysasynyň işjeň fazasyna geçýärkä, dünýä ummanlary täze temperatura rekordlaryny goýmagyň bosagasynda dur. Ýewropanyň Copernicus gullugynyň maglumatlaryna görä, maý aýynyň başynda deňziň ýüzüniň temperaturasy 2024-nji ýylyň iň ýokary derejesine ýetdi we bilermenler şu aýyň taryhda iň yssy aý bolmagynyň mümkindigini çaklaýarlar. Häzirki wagtda ummanlar antropogen işjeňligi sebäpli döreýän artykmaç ýylylygyň takmynan 90%-ni özüne siňdirmegini dowam etdirýär. Häzirki temperatura ýokarlanmasy uzak möhletli global maýlamaklygyň fonunda bolup geçýär: aprel aýyndaky temperatura eýýäm taryhda ikinji iň ýokary derejä öwrüldi, Ýuwaş ummanynyň tropiki böleginde bolsa rekord derejede deňiz ýylylygy hasaba alyndy. Bütindünýä Meteorologiýa Guramasy El-Ninýonyň işjeň tapgyrynyň maý we iýul aýlary aralygynda başlajakdygyny, ýeliň hem-de suwuň temperaturasynyň üýtgemegine, dünýäde gurakçylyga we güýçli ýagyşlara sebäp boljakdygyny çaklaýar. Bilermenler otuz ýyl mundan ozal goýlan rekordlara barabar güýçli "super" El-Ninýonyň bolmagynyň mümkindigini aradan aýyrmaýarlar. Berkeley Earth-niň alymlarynyň maglumatlaryna görä, bu prosessiň intensiwligi gury ýeriň temperaturasyna gönüden-göni täsir edýär. El-Ninýonyň täsiriniň, adatça, emele geleninden bir ýyl soň iň ýokary derejä ýetýändigini göz öňünde tutup, bilermenler 2027-nji ýylda ähli döwürleriň temperatura rekordynyň goýulmak howpynyň bardygy barada duýduryş berýärler.