Lexus Pekin awtosalonynda brendiň ösüşiniň dürli ugurlaryny görkezýän birbada birnäçe modeli tanyşdyrdy. Täze ulaglaryň arasynda LC500h kupesi, ýolsuz ýerden ýöreýän GX ulagynyň Black Edition wersiýasy we täzelenen LX bar. LC500h — bu 3,5 litrlik V6 hereketlendirijisine we takmynan, 359 at güýjüne eýe bolan elektrik hereketlendirijisine esaslanýan gibrid ulgamly flagman kupedir. Awtomobil 100 km/s tizlige, takmynan, 5 sekuntda ýetýär. Bu model dinamikany we tygşytlylygy özünde jemläp, brendiň abraýly önümi bolmagynda galýar. Täze GX modeli Toyota Land Cruiser 300 bilen meňzeş bolan TNGA-F ramaly platformasynyň esasynda ýasaldy. Ol dürli wersiýalarda, takmynan, 349 at güýjüni berýän 3,4 litrlik turbo V6 hereketlendirijisi ýa-da başga güýç enjamlary bilen üpjün edilýär. GX-iň Black Edition wersiýasy hem bar. Adyndan belli bolşy ýaly, ol garaldylan bezeglere we täze tigir disklerine eýe boldy. Doly täzelenen platformasy we global bazaryň üns merkezine gaýdyp gelmegi netijsinde GX modeline bolan gyzyklanma örän ýokary boldy. Täzelenen LX ramaly gurluşyny saklap galdy we has döwrebap daşky görnüşe eýe boldy. Awtomobil özüniň uly radiator gözenegi, inçe yşyk diodly optikasy we goýy reňkli bezegi bilen tapawutlanýar. Salonda rahatlyga we amatlylyga aýratyn üns berildi, onda oturgyçlaryň üçünji hatary we giň bagaž bölümi göz öňünde tutuldy. GX modeli islegiň artýan ýerleri bolan ABŞ we Hytaý bazarlaryna gönükdirilendir. LC500h tehnologik we dizaýn taýdan flagman wezipesini ýerine ýetirýär, LX bolsa doly ölçegli premium SUV segmentindäki ornuny saklaýar.