Britaniýanyň Teýt galareýasy 1990-njy ýyllaryň medeni dünýäsine bagyşlanan “The 90s: Art and Fashion” atly serginiň geçirilýändigini bildiriş etdi. 2026-njy ýylyň 8-nji oktýabryndan 2027-nji ýylyň 14-nji fewralyna çenli dowam etjek bu sergi döwrüň bitewi wizual dilini hödürlemek bilen, şol döwrüň sungatyny, fotosuratçylygyny, modasyny we submedeniýetlerini birleşdirer. Taslamanyň kuratory bolup Britaniýanyň Vogue žurnalynyň baş redaktory Edward Enninful çykyş edýär. Sergä 70-e golaý suratkeş, suratçy we dizaýner gatnaşar. Tomaşaçylara suratlary, heýkelleri, arhiw suratlaryny we egin-eşikleri öz içine alýan 100 töweregi eser görkeziler. Ýurgen Telleriň, Korin Deýiň we Naýjel Şafranyň işlerindäki "kämilsizligiň estetikasyna" aýratyn üns berilýär, olar Nik Naýtyň we Dewid Simsiň konseptual suratlary bilen ýanaşyk ýerleşýär. Serginiň moda bölüminde Oswald Boatengiň lybaslary, Jo Keýsli-Heýfordyň sergileriniň arhiw wideolary we Aleksandr Makkuin bilen Hüseýin Çalaýanyň meşhur siluetleri görkeziler. Guramaçylar Wiwýen Westwudyň we Jon Gallýanonyň derejesindäki dizaýnerleriň öz kolleksiýalarynda sosial synp we milli kimlik meselelerini gozgamak bilen, dürli döwürleriň elementlerini nähili kabul edendigini yzarlamagy meýilleşdirýärler.