2026-njy ýylyň TCS London marafony pellehana ýeten gatnaşyjylaryň sany boýunça rekord goýup, dünýäde iň köpçülikleýin marafon adyny resmi taýdan gaýtaryp aldy. Aralygy 59 830 adam üstünlikli ylgap geçdi, bu bolsa Nýu-Ýork marafonynyň mundan ozalky rekordyndan (59 226 adam) öňe geçmäge mümkinçilik berdi. «London Marathon Events» kompaniýasynyň baş direktory Hýu Braşer 2026-njy ýylyň çäresiniň hakyky rowaýaty bolandygyny belledi. Gatnaşyjylaryň köplügi bilen bir hatarda, marafon ajaýyp sport netijeleri bilen hem ýatda galdy: Sebastýan Sawe we Ýomif Kejelça resmi ýaryş şertlerinde taryhda ilkinji gezek aralygy iki sagatdan az wagtda ylgap geçdi. Sawe 1:59:30 netije bilen Eliud Kipçogeniň rekordyny täzeledi. Mundan başga-da, taryhda ilkinji gezek bir ýaryşyň dowamynda üç aýal maşgala aralygy 2 sagat 16 minutdan az wagtda ylgap geçdi. Aýallaryň arasyndaky täze rekord indi Tigst Assefa degişlidir, ol ýaryşy 2:15:51 netije bilen tamamlady. Günüň dowamynda Ginnesiň rekordlar kitabyna girmek üçin jemi 75 synanyşyk edildi, olaryň 38-si üstünlik bilen gutardy. 42 kilometrlik ýol, adatça bolşy ýaly, Britaniýanyň paýtagtynyň iň meşhur ýerlerinden — Grinwiçden we Katti Sarkdan başlap, Tauer köprüsine we şäheriň merkezi köçelerine çenli dowam etdi. Guramaçylar eýýäm 2027-nji ýyl üçin arzalary kabul edip başlady we çäräniň gerimini has-da giňeltmek üçin ony iki günlük formatda geçirmegiň mümkinçiliklerine seredýär.