Çagalar özlerine sowgat berilenden-de has beter, şol sowgady kimdir biri bilen paýlaşan wagtlary özlerini bagtly duýýarlar diýip, Developmental Science žurnalynda çap edilen barlagyň netijelerinde aýdylýar. ​Barlag işine bir ýaş dört aýlykdan iki ýaşa çenli bolan 134 çaga gatnaşdyryldy. Ata-eneleriň täsirini aradan aýyrmak üçin, synag mahaly ulular gulaklyk dakynyp, gözlerini-de ýumup oturdylar. ​Çagalara «iýmegi gowy görýän» oýunjak maýmyn tanyşdyryldy. Alymlar ilki çagalara sekiz sany süýjülik berip, olaryň sowgada bolan gyzyklanmasyny oýardylar. Soňra çagalar tötänleýin düzgün boýunça dört dürli ýagdaýa duçar edildi: ​Öz süýjüligini maýmyna bermek («ýitgili paýlaşma»); ​Alymyň beren täze süýjüligini oýunjaga bermek («ýitgisiz paýlaşmak»); ​Ulularyň süýjüligi maýmyna berýänini synlamak; ​Süýjüligi diňe özünde galdyrmak. ​Çagalaryň şatlyk derejesi garaşsyz bilermenler tarapyndan ýedi ballyk ulgam boýunça, wideoýazgylardaky ýüz keşplerini seljermek arkaly kesgitlendi. Netijeler süýjülik sowgat almakdan ýa-da alymyň görkezmesini ýerine ýetirmekden paýlaşmagyň has köp şatlyk getirýändigini görkezdi. ​Statistik seljeriş çagalaryň diňe bir oýunjagy «begendirendikleri» üçin şatlanman, eýsem, eden sahawatlaryndan hakyky içki lezzeti alandyklaryny tassyklady. ​Wiktoriýa uniwersitetiniň dosenti we barlagyň awtory Enda Tan, serişdeleri paýlaşmaga bolan höwesiň çagalykda örän ir ýüze çykýandygyny belleýär. Psihologlar bu duýgyny «ýyly şöhle» (warm glow) diýip atlandyrýarlar. ​Alymlar geljekde bu barlagyň gerimini giňeltmegi we çagalaryň şatlygyny göz garagynyň ulalmagy ýa-da deriniň elektrik geçirijiligi ýaly biologik görkezijiler arkaly has takyk tassyklamagy meýilleşdirýärler.