2026-njy ýylyň 18-nji fewralynda Türkmenistanyň Daşary işler ministrliginde 2028-nji ýylda Halkara hukugynyň ýylyny geçirmäge taýýarlyk görmek boýunça ilkinji maslahat geçirildi. Duşuşykda şu ýyl üçin meýilleşdirilen çäreleriň Meýilnamasyny durmuşa geçirmegiň ugurlary ara alnyp maslahatlaşyldy. Resminama guramaçylyk-usuly, ylmy-amaly, bilim, halkara hem-de maglumat-aragatnaşyk çäreleriniň toplumyny öz içine alýar. Bu barada ministrligiň metbugat gullugy habar berýär. Bellenip geçilişi ýaly, 2028-nji ýyly Halkara hukugynyň ýyly diýip yglan etmek baradaky başlangyç Türkmenistanyň Prezidenti tarapyndan Birleşen Milletler Guramasynyň Baş Assambleýasynyň 80-nji mejlisinde öňe sürüldi. Bu başlangyç halkara hukugyny ählumumy parahatçylygyň, ynanyşmagyň we durnukly ösüşiň esasy hökmünde berkitmäge, şeýle hem Türkmenistanyň hemişelik Bitaraplygynyň syýasy-hukuk guraly hökmündäki mümkinçiliklerini giňden açyp görkezmäge gönükdirilendir. Taýýarlyk meýilnamasynyň çäklerinde halkara ylmy-amaly maslahatlary geçirmek, bilim başlangyçlaryny durmuşa geçirmek, halkara we ikitaraplaýyn çäreleri guramak, şeýle hem ýaşlaryň ylmy taslamalaryny goldamak göz öňünde tutulýar. Maglumat taýdan üpjünçiligi güýçlendirmek maksady bilen, Türkmenistanyň DIM-niň resmi internet sahypasynda ýöriteleşdirilen bölüm dörediler hem-de milli we daşary ýurt köpçülikleýin habar beriş serişdelerinde giňişleýin düşündiriş işleri alnyp barlar. Maslahatyň jemleri boýunça degişli ministrlikleriň we pudaklaýyn edaralaryň bu ugurdaky işjeň utgaşykly hyzmatdaşlyga taýýardygy tassyklanyldy.