Hytaýyň Şençžen şäherinde adam şekilli robotlaryň söweşi boýunça dünýäde ilkinji mugt liganyň – Ultimate Robot Knockout Legend (UKRL) ligasynyň işe girizilendigi yglan edildi. Ýaryşlara ýörite söweşler üçin işlenip düzülen EngineAI kompaniýasynyň T800 modelleri gatnaşýar. Bu barada Interesting Engineering neşiri habar berýär. Ýaryş köp derejeli ulgam boýunça guralyp, 2026-njy ýylyň dekabr aýyna çenli dowam eder. Ýeňiji bahasy 1,44 million dollar bolan altyn çempionlyk guşagyny alar. Öndüriji T800 robotlaryny gatnaşyjylara mugt berýär. Bu robotlar gapdaldan aýak urgularyny ýerine ýetirmäge, 360 gradus öwrülmäge ukyply bolup, gaty litiý-ion batareýasynyň we aýak şarnirleriniň işjeň sowadyş ulgamynyň netijesinde dört sagada çenli işläp bilýär. Lidar we kameralar bilen köpugurly sensor ulgamy robota ugruny tapmaga we päsgelçiliklerden sowa geçmäge kömek edýär. Ýokary öndürijilikli hereketlendirijiler bolsa 450 Nm çenli aýlanma güýjüni üpjün edýär. Hünärmenleriň bellemegine görä, bu liga Hytaýyň tehnologik gazananlaryny görkezýär we jemgyýetiň gumanoid robotlar baradaky düşünjesini artdyrýar. Mundan başga-da, ýaryşlar robotlary hakyky şertlerde barlamaga mümkinçilik berýär. Bu bolsa tehnologiýalary işläp taýýarlamagyň möhletini 30%-den gowrak gysgaltmaga we barlaghana simulýasiýalaryny synagdan geçirmegi çaltlandyrmaga ýardam edýär. Söweşleriň dowamynda robotlaryň hereketleri, dinamiki deňagramlylygy we urga durnuklylygy gözegçilikde saklanar.