2025-nji ýylda dünýäniň futbol klublary transferler üçin rekord derejedäki pul möçberini — 13,08 milliard dollary sarp etdiler. Bu barada Halkara futbol federasiýasynyň (FIFA) hasabatynda bellenilýär. 2024-nji ýyl bilen deňeşdirilende, çykdajylar 52,3% ýokarlandy. Şol ýyl klublar oýunçylary satyn almak üçin 8,59 milliard dollar sarp edipdiler. Mundan öňki rekord 2023-nji ýylda hasaba alnyp, ol 9,66 milliard dollara deň bolupdy. FIFA-nyň maglumatlaryna görä, 2025-nji ýylda 24 558 sany transfer amaly hasaba alyndy. Bu görkeziji geçen ýyldakydan 7,7% köpdür. Şertnamalara jemi 5 283 sany klub gatnaşdy. Iňlis klublary hem transferler üçin edilen umumy çykdajylar (3,82 milliard dollar), hem-de transferlerden alnan tölegleriň möçberi (1,77 milliard dollar) boýunça öňde barýarlar. Oýunçy satyn almak üçin beýlekilerden has köp pul sarp eden toparlaryň arasynda «Mançester Siti», «Liwerpul» we «Çelsi» bar.