Aşgabat şäheriniň häkimligi Türkmenistanyň «Arkadag» futbol kluby bilen Saud Arabystanynyň «Al-Nasr» toparynyň arasynda AFC-2 Çempionlar ligasynyň 1/8 finalynyň ilkinji duşuşygyna biletleriň onlaýn satuwyny ýola goýdy. Duşuşyk 2026-njy ýylyň 11-nji fewralynda sagat 18:45-de Aşgabadyň Olimpiýa stadionynda geçiriler. Biletleri Aşgabat şäher häkimliginiň resmi saýtyndan — www.ashgabat.gov.tm arkaly ýa-da «Sanly şäher» atly ykjam goşundysy arkaly satyn alyp bolýar. Biletleriň bahasy stadionda saýlanan ýere görä 200 manatdan 400 manada çenli üýtgeýär. Guramaçylar resmi däl satyjylardan bilet satyn almagyň gadagan edilýändigini we şeýle ýagdaýda stadionyň içine goýberilmejekdigini duýdurýarlar. Her biletiň özboluşly QR-kody bar, ol girişde barlanýar we satyn alan adamyň şahsyýetini tassyklaýan resminamasy bilen baglanyşykly bolýar.