Türkmenistanyň «Kämil» awtosport klubynyň türgenleri dekabr aýynda Hytaýyň Çunsin şäheriniň Szýanszin etrabynyň Hab-Port senagat parkynda geçirilen motokross boýunça Hytaýyň çempionatynyň (CMX) halkara tapgyryna gatnaşdylar. Bu barada «Neýtralnyý Turkmenistan» gazeti habar berýär. Benzinde işleýän motosikller boýunça (250 kub santimetr) geçirilen ýaryşlarda Serdar Mollamyradow bilen Begenç Annaýew çykyş etdiler. Türgenler dünýäniň öňdebaryjy öndürijileri bolan QJMotor, CFMoto we KAYO kompaniýalarynyň zawod toparlary bilen bäsleşdiler. Elektrik motosiklleri boýunça ýaryşlarda klubuň abraýyny Konstantin Fýodoryçew bilen Karen Awagýan goradylar. Szýanszindäki ýaryş ýoly gaty örtükli we ýokary tizlikli bölekleri bilen tapawutlanýar, bu bolsa hem tehnikadan, hem-de sürüjilerden ýokary taýýarlyk derejesini talap edýär. Hytaýda geçirilen ýaryşda toparyň ähli işlerini Türkmenistanyň sport ussady, klubyň direktory Şamyrat Gurbanow utgaşdyrdy. Onuň «Dakar–2015» rallisine hem-de «Ýüpek ýoly» halkara ralli-reýdine gatnaşmagy bilen, sport ýaryşlarynda uly tejribesi bar. Gurbanowyň bellemegine görä, Çunsindäki ýaryşlar 2026-njy ýylda geçiriljek täze ýaryşlara taýýarlyk görmek üçin topara gymmatly tejribe boldy. Geljekde «Kämil» klubynyň sürüjileri goňşy ýurtlaryň açyk çempionatlaryna gatnaşarlar.