Türkmenistanyň Maliýe we ykdysadyýet ministrligi ykdysady iş alyp barýan subýektler tarapyndan maliýe hasabatlylygyny bermek boýunça tertibe üýtgeşmeleri girizdi. Degişli №246-iş buýruk ministr M. Astanagulyýew tarapyndan 2025-nji ýylyň 29-njy dekabrynda gol çekilip, 31-nji dekabrda Adalat ministrliginde bellige alyndy. Täze düzgünlere laýyklykda, daşary ýurt maýa goýumlary bolan subýektlerden başgalary aralykdaky we ýönekeýleşdirilen aralykdaky maliýe hasabatlylygyny hasabat senesiniň yz ýanyndaky aýyň 20-sinde, umumy maksatly we ýönekeýleşdirilen maliýe hasabatlylygyny bolsa hasabat ýylynyň yz ýanyndaky ýylyň 25-nji ýanwaryndan gijä galman bermelidirler. Daşary ýurt maýa goýumlary bolan subýektler üçin maliýe hasabatlylygynyň bermegiň möhletleri aralykdaky hasabat senesiniň yz ýanyndaky aýyň 25-i, umumy maksatly we ýönekeýleşdirilen maliýe hasabatlylygy hasabat ýylynyň yz ýanyndaky ýylyň 25-nji ýanwarydyr. Önümçilik birleşikleri, birleşikler, paýdarlar jemgyýetleri, agentlikler jebislendirilen maliýe hasabatlylygyny aralykdaky hasabat senesiniň yz ýanyndaky aýyň 30-na we ýyllyk maliýe hasabatlylygyny bolsa degişlilikde hasabat ýylynyň yz ýanyndaky ýylyň 1-nji fewralyndan gijä galman bermelidirler. Ýerine ýetiriji häkimiýetiň merkezi we ýerli edaralary jebislendirilen maliýe hasabatlylygyny aralykdaky hasabat senesiniň hasabat döwri tamamlanandan soň 40 günden gijä galman, ýyllyk maliýe hasabatlylygyny bolsa degişlilikde hasabat ýylynyň yz ýanyndaky ýylyň 1-nji fewralyndan gijä galman bermelidirler. Üýtgeşmeler 2019-njy ýyldan bäri hereket edip gelýän gözükdirijä girizilip, ol ýurdumyzda buhgalterçilik hasaba alnyşynyň we maliýe hasabatlylygynyň düzülişini we berilişini kämilleşdirmegi maksat edinýär.