iPhone 16 2025-nji ýylyň üçünji çärýeginiň jemi boýunça dünýäde iň köp satylan smartfon boldy. Apple we Samsung kompaniýalarynyň her biriniň smartfonlary üç aýlyk hasabat döwründe umumy smartfon satuwynyň 20%-ini emele getiren ilkinji onlukda bäş orun aldy. Taryhda ilkinji gezek reýtingiň ilkinji bäş ornuny 5G smartfonlary eýeledi. Bu bolsa 5G-niň ähli sebitlerde sarp edijiler üçin standarta öwrülendigini görkezýär. Counterpoint Research kompaniýasynyň maglumatlaryna görä, üçünji çärýekde iPhone 16-nyň satuw paýy umumy möçberiň 4%-ine deň boldy. Muňa Hindistanda islegiň ýokary bolmagy we Ýaponiýanyň bazarynda satuwyň dikeldilmegi ýardam etdi. Şol bir wagtyň özünde, iPhone 16 Pro we iPhone 16 Pro Max flagman modelleri uly pese gaçyşy görkezdi, çünki ABŞ, Beýik Britaniýa we Hytaý ýaly esasy bazarlarda sarp edijiler täze nesil modellerini almagy makul bildi. iPhone 17 Pro Max çärýegiň ahyryna çenli çäkli elýeterlilige garamazdan, sanawda onunjy orny eýeledi. Apple-iň täze flagmany sentýabryň jemi boýunça iň köp satylan smartfon boldy. Flagmanlaryň ikisi-de surat we wideo düşürmekde has kämilleşdi. Täze A19 Pro çibi we kämilleşdirilen sowadyş ulgamy döredijilik işleri üçin ýokary öndürijiligi üpjün edýär. Reýtingde bäş orny Samsung-yň Galaxy A hatarynyň modelleri eýeledi. Galaxy A16 5G modeli çärýekde iň köp satylan Android smartfony boldy. Ortaça arzan Galaxy A36 we Galaxy A56 smartfonlary hem emeli aň funksiýalarynyň netijesinde özünden öňkülerden has ýokary satuwy görkezdi. Ilkinji onlukda LTE goldawly ýeke-täk smartfonlar Galaxy A16 4G we Galaxy A06 boldy. Bu modeller ösüp barýan bazarlarda, şol sanda Latyn Amerikasynda, Ýakyn Gündogarda we Afrikada esasy orunlary saklaýar. Analitikler ortaça baha kategoriýasyna degişli smartfonlaryň EA funksiýalarynyň girizilmegi netijesinde iň köp satylan smartfonlaryň sanawynda öz ornuny saklamagyna garaşýar. Şeýle tehnologiki kämilleşdirmeler bu segmenti has bäsdeşlige ukyply edýär we ulanyjy tejribesini flagman modelleriňkä ýakynlaşdyrýar.