Aktýor Bred Pitt we "Formula 1-iň" sürüjisi Jorj Rassel Mercedes-AMG GT 4-Door awtoulagynyň täze elektrik wersiýasynyň mahabat kampaniýasynda surata düşdüler. Surata düşüriş işleri Las-Wegasda geçirildi, onda Mercedes-Benz geçen hepde üsti örtükli prototipini görkezdi. Bu awtoulag mahabat roliginde hem ulanyldy. YouTube-da ýerleşdirilen wideoda Pitt myhmanhanadan çykyp, hyzmatkärden awtoulagynyň açaryny yzyna bermegini soraýar. Hyzmatkär bu işi sürüjä tabşyrýar, ol bolsa Jorj Rassel bolup çykýar. Ulagy getirýän wagtynda, sürüji açary Pitte gowşurmazdan ozal, ýerasty awtoduralgada birnäçe ýeser hokgalary we öwrümleri (drift) edýär. Täze Mercedes-AMG GT 4-Door Coupe Porsche Taycan-nyň we Audi RS e-tron GT-niň bäsdeşi hökmünde görkezilýär. Model AMG-EA-nyň platformasynda guruldy. Elektrik ulagynyň ýokary tehnologiýaly akkumulýator batareýasyny we üç sany aksial akymly elektrik hereketlendirijisini almagyna garaşylýar. AMG GT XX konseptinde olaryň umumy kuwwaty 1360 at güýjüne ýetýär.