UEFA-nyň Çempionlar ligasynyň bäşinji tapgyrynyň jemleýji oýunlary ýokary netijeliligi görkezdi – oýun gününiň dokuz oýnunda futbolçylar jemi 42 gol geçirdi. Tapgyryň merkezi oýnunda “Arsenal” Mýunheniň “Bawariýasyny” 3:1 hasabynda utdy. Şeýlelikde, klub ýaryş jedwelinde birinji orny eýeläp, häzirki ýaryşda iň ýokary utuk sanyny gazanan ýeke-täk topar boldy. Ýer eýeleriniň düzüminden Ýurren Timber (22-nji minut), Noni Madueke (69) we Gabriel Martinelli (76) gol geçirdi, myhmanlardan 17 ýaşly Konrad Laýmer (32) tapawutlandy. “Bawariýa” ähli ýaryşlary hasaba alanyňda möwsümde ilkinji ýeňlişine sezewar boldy. Häzire çenli klub 19 oýunda utulman gelýärdi we bu oýunlarda 17 ýeňiş gazanypdy. Netijede, Wensan Kompaniniň topary öňdebaryjy 10 liganyň arasynda hasabynda ýeňliş bolmadyk ýeke-täk topardy. “Arsenal” yzygider 16 oýun bäri utulman gelýär. Soňky gezek Londonyň kluby Angliýanyň çempionatynyň 3-nji tapgyrynyň oýnunda “Liwerpuldan” utuldy. Ýeri gelende, “Liwerpul” asgynlamagyny dowam etdirýär. Tomusky transfer penjiresindäki rekord işjeňlik netije bermedi. “Mersisaýdlylar” “Enfildde” Eýndhoweniň “PSW-sinden” 1:4 hasabynda utuldy. Iňlis kluby üçin bu ähli ýaryşlarda soňky 12 oýunda dokuzynjy ýeňliş boldy, üstesine-de, Arne Slotyň topary soňky üç oýunda üç gol tapawudy bilen utuldy. Grekleriň “Olimpiakosy” bilen Madridiň “Realynyň” arasyndaky oýnuň hem netijeli bolmagy geň galdyrdy. “Real” Kilian Mbappeniň pokeri bilen 3:4 hasabynda utdy. Fransiýaly futbolçy het-trigiň tizligi boýunça ýaryşyň taryhynda ikinji netijäni görkezdi – ol alty minut 42 sekunt tapawut bilen üç gol geçirdi (Mohamed Salah 2022-nji ýylyň oktýabrynda “Liwerpulyň” “Reýnjerse” garşy oýnunda muny ýarym minut çalt ýerine ýetiripdi). Tapgyryň iň netijeli oýny “Pari Sen-Žermeniň” “Tottenhemi” 5:3 hasabynda utmagy boldy. Häzirki çempionlara ýeňiş gazanmaga Witinýanyň het-trigi kömek etdi. Ýene bir gyzykly oýunda Madridiň “Atletikosy” Milanyň “Interinden” güýçli geldi – 2:1. Oýnuň soňy 93-nji minutda “Atletikonyň” goragçysy Hose Mariýa Himenesiň goly bilen kesgitlendi. Galan oýunlaryň netijeleri: “Kopengagen” – “Kaýrat” 3:2 “Pafos” – “Monako” 2:2 “Aýntraht” – “Atalanta” 0:3 “Sporting” – “Brýugge” 3:0