Eli Lilly amerikan kompaniýasy 1 trln dollar bazar bahasyna ýetip, taryhda şeýle görkezijä ýeten ilkinji farmasewtika kompaniýasy boldy. Häzire çenli bazarda bu derejä, esasan, tehnologiýa kompaniýalary ýetipdi diýip, CNBC belleýär. Ýylyň başyndan bäri Eli Lilly-nyň paýnamalary Zepbound (artykmaç agramy azaltmak üçin) we Mounjaro (süýji keseline garşy) derman serişdelerine bolan ýokary islegiň netijesinde 37% gymmatlady. Üçünji çärýekde diňe Mounjaro serişdesiniň satuwy 6,52 mlrd dollara, Zepbound bolsa – 3,59 mlrd dollara ýetdi. Bu geçen ýylyň degişli döwründäkiden 109% we 184% ýokarydyr. Maýadarlar 2026-njy ýylda bu inýeksiýa serişdelerini gerdejik görnüşinde çykarmagy meýilleşdirýän kompaniýanyň mundan beýläk hem ösüş gazanmagyna garaşýar. Hünärmenleriň hasaby boýunça, 2030-njy ýyllaryň başyna çenli agramy azaltmak üçin derman serişdeleriniň bazary 150 mlrd dollardan geçer we Eli Lilly onda öňdebaryjy oýunçylaryň biri bolup galar.