«Türkmenistanyň nebiti we gazy – 2025» 30-njy halkara maslahaty we sergisi (OGT 2025) dünýäniň iri köpçülikleýin habar beriş serişdeleriniň goldawyny aldy. Çäräniň resmi media hyzmatdaşlarynyň hatarynda Euronews, BNE IntelliNews, Newsbase, Interfax, Energy Intelligence hem-de birnäçe öňdebaryjy Ýakyn Gündogar neşirleri bar. «Türkmenistan Ýewraziýanyň ýüreginden dünýä derejesindäki dialoga we maýa goýumlaryna gapylaryny açýar» diýlip, Euronews teleýaýlymynyň ýörite promo-roliginde aýdylýar. 17-nji oktýabrda geçirilen Hökümet mejlisiniň barşynda wise-premýer B.Amanow forumy geçirmäge görülýän taýýarlyk işleri barada hasabat berdi. Bellenilişi ýaly, häzirki wagtda sergä gatnaşmak üçin isleg bildiren daşary ýurt kompaniýalaryň 70-den gowragy, ýerli kärhanalaryň hem-de hususy telekeçileriň 30-a golaýy, şeýle-de ýurdumyzyň degişli ministrlikleri we pudaklaýyn dolandyryş edaralary sergi diwarlyklary bilen gatnaşmak üçin hasaba alyndy. Utgaşykly görnüşde geçiriljek maslahata gatnaşmaga jemi 1 müň 390-a golaý wekil isleg bildirdi. Maslahatyň çäklerinde “Halkara parahatçylyk we ynanyşmak ýylynda global energiýanyň geljegini şekillendirmek — innowasiýa, energetika geçişi we strategik hyzmatdaşlyk”, “Türkmen tebigy gazynyň artýan orny: eksport ugurlarynyň giňeldilmegi we energetika geçişine itergi bermek” atly plenar mejlisleri, möhüm ähmiýetli meseleler boýunça mowzuklaýyn mejlisleri geçirmek meýilleşdirilýär.