Fransiýadan Rişar Plo otluçöpden Eýfel diňiniň dünýäde iň uly modelini döretdi. Ol bu taslama 2016-njy ýylda başlady we oňa tas sekiz ýyl, 706 900 otluçöp we 6 müň ýewro sarp etdi. Bu barada NPR habar berýär. Ilkibaşda Ginnesiň rekordlar kitaby onuň bu üstünligini ykrar etmekden ýüz öwürdi. Sebäbi heýkelde ulanylan otluçöpler söwda taýdan elýeterli däldi. Plo olary gönüden-göni öndürijiden başsyz satyn alandygyny, sebäbi olary kükürtden arassalamak üçin wagt sarp etmek islemändigini aýtdy. Onuň bu işiniň şowsuz bolandygy baradaky habar KHBS-de giňden ýaýrandan soň, Rekordlar kitabynyň wekilleri düzgünlere gaýtadan seretmek we rekordy fransiýaly höwesjeňe bermek kararyna geldiler. Rişar diňiň özüçe wersiýasyny 2016-njy ýylda, internetde liwanly Toufik Daher tarapyndan otluçöpden gurlan Eýfel diňiniň suratyny göreninden soň gurmaga başlady. Daheriň modeliniň beýikligi 6,5 metr bolup, 600 000 otluçöpden ybaratdy. Rişar Plo onuň rekordyny täzelemek üçin, beýikligi 7,2 metr bolan modeli gurdy. Ol bu işde ýelim, gaýçy hem-de asyl diňiň proporsiýasyny we jikme-jikliklerini takyk ýerine ýetirmek üçin çyzgyç we kalkulýator ulandy. Şeýle-de, ol Eýfel diňiniň manysyna we ähmiýetine has gowy düşünmek üçin, onuň taryhyny we binagärligini öwrendi.