Türkmenistanyň mekdep okuwçylary 2–7-nji awgust aralygynda Londonda geçirilen «IWISE Global Final London 2026» halkara bäsleşiginde jemi 10 medal, şol sanda 6 sany altyn medal gazandy. Bäsleşige 25 ýurtdan okuwçylar gatnaşdy. Bäsleşikde Türkmenistanyň adyndan 10 sany mekdep okuwçysy çykyş etdi. Topara Arkadag şäheriniň 1-nji ýöriteleşdirilen okuw-terbiýeçilik toplumynyň informatika mugallymy Myrat Sähetgulyýew we Aşgabat şäheriniň dil derslerini çuňlaşdyryp öwredýän ýöriteleşdirilen 97-nji orta mekdebiniň taryh mugallymy Goçmyrat Baýramow ýolbaşçylyk etdi. Gatnaşyjylar robototehnikanyň «Line follower robot», «Maze solving robot» we «Mini-sumo robot» ugurlary boýunça bäsleşdi. Altyn medallara Aşgabat şäheriniň ýöriteleşdirilen 97-nji orta mekdebinden Resulberdi Orazberdiýew, Salyh Kakalyýew we Resul Geldiýew, Aşgabat şäheriniň 7-nji orta mekdebinden Selim Begmuradow, Aşgabat şäheriniň ýöriteleşdirilen 87-nji orta mekdebinden Nurmyrat Kulow hem-de Türkmenistanyň Goranmak ministrliginiň Berdimuhamet Annaýew adyndaky 1-nji ýöriteleşdirilen harby mekdebiniň okuwçysy Malikmyrat Annamuradow mynasyp boldy. Kümüş medallary Salyh Altyýew (Aşgabat şäheriniň ýöriteleşdirilen 97-nji orta mekdebi), Rozymyrat Ýagşymyradow (Aşgabat şäheriniň ýöriteleşdirilen 13-nji orta mekdebi), Ebubekir Berdiýew (Arkadag şäheriniň ýöriteleşdirilen 3-nji orta mekdebi) we Umyt Atamyradow (Arkadag şäheriniň ýöriteleşdirilen 2-nji orta mekdebi) gazandy. Ýaryşda bäş sany türkmen gatnaşyjysy aýratyn tapawutlanyp, «Best of the best» diýen ada we ýörite pul baýraklaryna mynasyp boldy.