Emeli aň diline we ýurduna garamazdan, habarlaryň takmynan ýarysynyň mazmunyny üýtgedýär ýa-da ýoýýar. Şeýle netijä Ýewropanyň ýaýlym bileleşiginiň (EBU) we dünýäniň 18 ýurdunyň 22 jemgyýetçilik ýaýlymy tarapyndan geçirilen giň gerimli barlag şaýatlyk edýär. EBU-nyň habar beriş serişdeleri boýunça direktory we baş müdiriň orunbasary Žan-Filipp De Tender meseleleriň yzygiderli we ulgamlaýyn häsiýete eýedigini belledi: «Barlagyň görkezmegine görä, kemçilikler ýek-tük ýagdaý däl. Olar dil we serhet bilen çäklenmeýär we jemgyýetiň ynamyna howp döredýär. Adamlar kime ynanjakdygyny bilemeseler, ahyrsoňy hiç kime ynanmaýarlar, bu bolsa demokratik proseslere gatnaşmagy gowşadyp biler». Professional žurnalistler ChatGPT, Copilot, Gemini we Perplexity ulgamlaryndan 3000-den gowrak jogaby barladylar. Bahalandyrmak dört ölçegde edildi: takyklyk, çeşmeleriň bardygy, hakykat bilen pikirleriň tapawudy, kontekstiň dolulygy. Netijeler şunuň ýaly boldy: Jogaplaryň 45%-inde azyndan bir çynlakaý ýalňyşlyk bar. Iň köp gabat gelýän mesele — ýalan ýa-da ýok çeşmä salgylanylmak (31%). Jogaplaryň 20%-inde uly ýalňyşlyklar, 14%-inde bolsa kontekst ýetmezçiligi bardy. Modelleriň arasynda Gemini iň ýaramaz netijäni berdi — jogaplaryň 76%-inde mesele bar. Beýleki ulgamlaryň netijeleri hem alada goýýar: Copilot — 37%, ChatGPT — 36%, Perplexity — 30%. Şeýle-de, AI jogaplarynyň ynamly äheňiniň ýalan ygtybarlylyk duýgusyny döredýändigi bellendi. Şeýle-de bolsa, BBC we Reuters Institute maglumatlaryna görä, AI arkaly habarlara bolan gyzyklanma artýar: häzir ulanyjylaryň takmynan 7%-i, ýaşlaryň (25 ýaş çenli) arasynda bolsa bu görkeziji 15%-e ýetýär.