AFK-nyň Elita Çempionlar ligasynyň finalynda “Kawasaki Frontale” ýapon topary Saud-Arabystanyndan “Al-Ahli” bilen duşuşar. 30-njy aprelde geçen ýarym final oýnunda “Kawasaki” Kriştianu Ronaldunyň oýnaýan “Al-Nasr” toparyny utdy. Jiddada geçen oýun 3:2 hasabynda tamamlandy. Ýapon klubunyň düzüminde Tasuýa Ito (10-njy minut), Ýuto Odzeki (41) we Akihiro Ienaga (76) tapawutlandy. “Al-Nasr” üçin Sadio Mane (28) we Aýman Ýahýa (87) gol geçirdi. Ronaldunyň hasabyna gol ýa-da assist ýazylmady. Bir gün öň geçirilen beýleki bir ýarym final oýnunda “Al-Ahli” Saud Arabystanynyň başga bir kluby “Al-Hilýaly” utdy (3:1). Ýeňijileriň düzüminde Roberto Firmino (9), Aýwan Toni (27) we Firas Al-Buraýkan (90+8) gol saldy. “Al-Hilýalyň” ýeke-täk golunyň awtory Salem Al-Dawsari (42) boldy. Oýnuň 59-njy minutynda 2:1 hasapda “Al-Hilýalyň” goragçysy Kalidu Kulibali ikinji sary duýduryşyny aldy we meýdançadan çykaryldy. 85-nji minutda “Al-Ahli” penaltiden depmäge mümkinçilik gazandy, ýöne Frank Kessýe gol geçirip bilmedi. “Al-Ahli” bilen “Kawasaki Frontaleniň” arasyndaky final oýny 3-nji maýda, şenbe güni Jiddada geçiriler.