TikTOk wideoplatformasyna eýelik edýän ByteDance hytaý kompaniýasy täze emeli aň (EA) ulgamyny tanyşdyrdy. «OmniHuman-1» atly bu ulgam suratlary tebigy we janly wideolara öwürýär. Bu ulgam adamyň bedeniniň keşbini doly janlandyryp bilýär diýip, TechCrunch habar berýär. «OmniHuman-1» adamlaryň gürleýşine görä el we ýüz hereketlerini ýerine ýetirip bilýär. Öňki emeli aň modellerinden tapawutlylykda, ol diňe ýüz keşbini ýa-da bedeniň ýokarky bölegini däl-de, «tutuş bedeni» janlandyryp bilýär. Soňky ýyllarda suratlardaky adamlary hereket etdirmekde, ýagny olaryň animasiýasynda ep-esli öňegidişlik gazanyldy. Şeýle-de bolsa, bar bolan usullar uly göwrümli wideolary döretmekde kynçylyk çekýär. Bu bolsa olaryň hakyky durmuşda ulanylmagyny çäklendirýär. «OmniHuman-1» EA ulgamy 18 müň 700 sagatdan (2 ýyl 1 aýdan) gowrak adam wideo-maglumatlary bilen türgenleşdirildi. Onuň täzelikçi usuly dürli giriş maglumatlaryny – tekst, ses we beden hereketlerini birleşdirýär. Geçirilen synaglaryň netijesinde, «OmniHuman-1» bar bolan beýleki ulgamlardan dürli görkezijiler boýunça üstün çykdy. Bu usul arkaly ýasalan wideolaryň mysallaryna şu salgydan tomaşa edip bilersiňiz.