(“Watan” gazeti, №87, 15.07.2017) Paýtagtymyz Aşgabat özüniň gözelligi, milli binagärligi, gaýtalanmajak suw çüwdürimleri, arassa we täsin giň tokaý zolaklary, giň meýdançalary, kaşaň myhmanhanalary, arassalygy bilen dünýä ýüzüne meşhurdyr. Orta Aziýanyň merjen şäheri Aşgabat Köpetdagyň belent gerişleri kimin öwşün atýar. Aşgabat döwletimiziň ýüregidir we ýüzüdir. Hemmämize mälim bolşy ýaly, Orta Aziýa sebitiniň taryhynda ilkinji gezek paýtagtymyz Aşgabat şäherinde Ýapyk binalarda we söweş sungaty boýunça V Aziýa oýunlary geçiriler. Bu waka Hormatly Prezidentimiziň tagallasy bilen ýurdumyzda milli sporty ösdürmäge gönükdirilen işleriň bimöçberdigini dünýä jemgyýetçiligine aýan edýär. Paýtagtymyzyň merkezinde kemala gelen Olimpiýa şäherjigi görenleri haýrana goýýar. Bu täsin Olimpiýa şäherjiginiň düzümindäki 30-dan gowrak halkara olimpiýa komitetiniň talabyna laýyk gelýän sport desgalary V Aziýa oýunlarynyň ýeňişlere beslenjekdiginden habar berýär. Hormatly Prezidentimiziň tagallasy bilen Olimpiýa şäherjiginde birnäçe halkara synag ýaryşlary geçirildi. Synag ýaryşlarynyň dowamynda türgenlerimiziň ussatlygy aýdyň ýüze çykdy. Ajaýyp gözelligi özünde jemleýän Olimpiýa şäherjigi ýurdumyzyň sport ulgamynyň kämilleşmegine ýaş nesilleri sporta çekmäge, bedenterbiýäni ösdürmäge, ýaş türgenleriň ussatlygyny artdyrmaga mümkinçilik berer. Köpetdagyň ajaýyp jülgeleri, dürli taryhy gymmatlyklar, Nusaý galasy, Halkara Ahalteke atçylyk sport toplumy ýurdumyza gelýän myhmanlary, jahankeşdeleri, köpçülikleýin habar beriş serişdeleriniň wekillerini haýrana goýýar. Munuň özi Türkmenistan döwletimiziň ähli babatda gazanýan üstünlikleriniň dünýäniň ünsüni çekýändigine şaýatlyk edýär. Goý, halkymyza bagtyýar döwri serpaý eden Hormatly Prezidentimiziň jany sag, il-ýurt bähbitli alyp barýan işleri rowaç alsyn!