XXI asyra «kosmos tizliginde ösýän asyr», «aň asyry» diýilýär. Muňa dünýäniň şu günki güne çenli ösüşine taryh bilen saldarlap syn edeniňde magat göz ýetirýärsiň. Häzir dünýä ykdysadyýetinde, medeniýetinde, ylym-biliminde, senagatynda, oba hojalygynda, tehnologiýasynda ýa-da döwletleriň, ynsanlaryň arasyndaky medeni-gumanitar gatnaşyklarynda aňa, akyl-paýhasa aýratyn sarpa goýlup, oňyn netijeler gazanylýar. Dünýäniň tizligine eýermek isleýärmiň?! Onda dana pederlerimiziň: «Älem-jahanyň syrlaryny diňe okamak bilen açyp bolýar», «Bilim bilen hikmet — altyndan gymmat» diýen jümlelerini doly goldap, ylym-bilimi ösdürmäge ýardam bermeli bolýaň. Ine, hormatly Prezidentimiz ählihalk saýlawlary esasynda döwlet başyna geçen ilkinji gününden her bir zerurlygy juda öňdengörüjilik bilen aýny wagtynda duýup, ylym-bilim ulgamynyň binýadyny özgertmek boýunça düýpli özgertmelere başlady. Milli Liderimiz döwrüň talabyny ödeýän enjamlar bilen enjamlaşdyrylan çagalar baglaryny, orta we ýörite orta mekdepleri, çagalaryň sagaldyş we dynç alyş merkezlerini, ýokary okuw mekdeplerini yzygiderli gurdurmak bilen çäklenmän, bu okuw-terbiýeçilik ojaklarynda milli ruhumyza kybap okuw-terbiýeçilik maksatnamalaryna laýyk bilim-terbiýe bermäge, sapaklary okatmagyň dürli usullaryndan peýdalanyp geçmäge uly ähmiýet berdi. Okuw jaýlarynda sapak geçmegiň metodikasynda, esasan, dünýäde uly orun alan işjeň usullaryň ornaşdyrylmagy bolsa, bilimiň hilini ýokarlandyryp, okuwçylaryň dersleri ýeňil özleşdirmegine mazaly kömek edýär. Okuw derslerini mäkäm özleşdirmek bolsa uçurymlaryň durmuş ýoluny röwşenlendirmäge itergi berýär. Bilim we ylym özgertmeleri ösen aňly, sagdyn bedenli, ruhy kämil uçurymlary kemala getirip, döwletimizi has-da belent derejelere ýetirmäge arkadaýanç bolýar. Ýurdumyzyň tehniki ykdysady kuwwatyny, onuň intellektual binýadyny berkitmek, milli bilim we ylym ulgamyny hemmetaraplaýyn ösdürmek, Watanymyzyň berkararlygynyň, abadançylygynyň, halkymyzyň bagtly şu gününiň, eşretli geljeginiň bähbidinedir. Berkarar döwletimiziň bagtyýarlyk döwründe kabul edilen milli maksatnama esasynda Diýarymyzyň ähli ýerlerinde häzirki zaman kompýuterler, okuw-tehniki enjamlar, interaktiw-multimediýa tehnologiýalar bilen üpjün edilen okuw-terbiýeçilik ojaklarynyň gurulmagy Garaşsyz, hemişelik Bitarap Türkmenistan döwletimiziň saýlap alan ynsanperwer ýörelgelerine daýanyp, gurmak we döretmek ýoly bilen bedew badynda halkymyzyň ýaşaýyş-durmuş derejesiniň has-da ýokarlanmagyna tarapdyr. Muňa hormatly Prezidentimiziň ýurdumyzyň ykdysadyýetiniň ähli pudaklarynda bäsleşige ukyply, ýokary bilimli kämil hünärmenler bilen doly üpjün etmek maksady bilen ýakynda gol çeken «Türkmenistanyň Oguz han adyndaky Inžener-tehnologiýalar uniwersitetini döretmek hakyndaky» Permany, ylym-bilimi özgertmekdäki ýene-de bir buýsandyryjy buşluklaryň birine öwrüldi. Bu okuw toplumynyň kaşaň binalary, nesip bolsa, şu ýylyň 1-nji sentýabrynda talyp ýaşlara gapylaryny giňden açar. Onsoň sanlyja ýyldan ylym-bilimden bilini berkden guşan inžener-tehnologlar ýurdumyzyň ykdysadyýetini ösdürmäge döredijilikli zähmetlerini gaýgyrmazlar. Ýene-de bir bellemeli buýsançly hakykat, Berkarar döwletimiziň bagtyýarlyk döwründe ýaşlarymyza daşary ýurtlaryň ýokary okuw jaýlarynda okamaga hem giň mümkinçilikler döredilýär. Häzirki döwürde türkmen ýaşlarynyň müňlerçesi Hytaýyň, Russiýanyň, Malaýziýanyň, Türkiýäniň, Horwatiýanyň we beýleki ýurtlaryň abraýly ýokary okuw mekdeplerinde bilimlerini artdyryp, ökde hünärmenler bolup, döwrebap tehnologiýalar bilen enjamlaşdyrylan zawod-fabriklerimizde dürli kärlerde işlemäge mümkinçilik tapýarlar. Ýaşlaryň bilimli bolmagyna güýç bermek, döwletimiziň geljeginiň kuwwatly bolmagyna itergi bermekdir. Şeýle bolansoň, hormatly Prezidentimiz mugallymlardan elmydama ýaşlara kämil bilim we terbiýe bermegi, olarda ata-enä, Garaşsyz Watanymyza bolan mizemez söýgini döretmegi ündeýär. Şunuň özem eşretli we bagtyýar durmuşyň gözbaşynyň döwrebap bilimden we ylymdan, milli ruhumyza mahsus sagdyn terbiýeden gözbaş alýandygyna şaýatlyk edýär. Nesillerimize berilýän bilimi dünýä derejesine çykarmak arkaly Garaşsyz Watanymyzyň bagtyýar günlerini dowamat dowama öwürýän, Zemin içre Türkmen döwletiniň we halkynyň şan-şöhratyny Arşa göterýän alym Liderimiziň jany sag, belent başy aman bolup, il-ýurt bähbitli köpugurly işleri barha rowaç alsyn! Baýram Muhammedow