Türkmenistanyň wekilleri 17–19-njy noýabr aralygynda Filippinleriň paýtagty Manilada geçirilen Aziýanyň ösüş bankynyň (AÖB) durnukly syýahatçylyk boýunça ilkinji forumyna gatnaşdylar. Türkmenistanyň Medeniýet ministrliginiň resmi saýtynda habar berlişi ýaly, foruma AÖB-na agza ýurtlaryň syýahatçylyk, ösüş we maliýe ministrlikleriniň wekilleri, bank ulgamynyň hünärmenleri hem-de halkara bilermenler gatnaşdylar. Forumyň esasy maksady syýahatçylygy durnukly we ähli gatlaklary öz içine alýan ykdysady ösüşiň guraly hökmünde peýdalanmakda, hususy pudagyň maýa goýumlaryny çekmekde hem-de täze iş orunlaryny döretmekde AÖB-nyň we ösüp barýan agza ýurtlaryň mümkinçiliklerini pugtalandyrmakdan ybarat boldy. Forumyň maksatnamasy üç tematiki ugur boýunça guraldy: bilim we tejribe alyşmak forumy; amaly okuw sapaklary; GSTC standartlary boýunça okuwlar. Bilim we tejribe alyşmak forumynyň dowamynda gatnaşyjylar syýahatçylyk ugurlaryny dolandyrmak, sebitara integrasiýa, hususy pudagy ösdürmek we syýahatçylyk ulgamyna toplumlaýyn maýa goýumlaryny çekmek meseleleri boýunça özara tejribe alyşdylar. Amaly okuw sapaklarynda syýahatçylyk infrastrukturasynyň taslamalaryny işläp düzmek, hususy telekeçiligiň hasabyna ösüşi höweslendirmek hem-de syýahatçylygy durnukly ösüşiň guraly hökmünde peýdalanmak meselelerine garaldy. GSTC standartlary boýunça okuwlar Durnukly syýahatçylyk boýunça Ählumumy geňeş (Global Sustainable Tourism Council) bilen bilelikde geçirildi. Okuw maksatnamasy çäkleri durnukly dolandyrmagyň halkara standartlaryny iş ýüzünde ulanmak meselelerine gönükdirildi.