Halkara Energetika agentliginiň başlygy (HEA) Fatih Birol Türkiýede BMG-niň howa boýunça sammitinde (COP31) «The Guardian» neşiri bilen söhbetdeşlikde dünýäniň kömri, nebiti hem-de gazy yzda galdyryp, elektrik eýýamyna ymykly gadam basandygyny aýtdy. Birol dünýä ykdysadyýetinde elektrik togunyň önümçiliginiň iki esseden hem artandygyny belledi. Bu gazylyp alynýan energiýa çeşmeleriniň nyrhlarynyň üýtgäp durmagy hem-de olaryň daşamalaryndaky bökdençlikler bilen baglylykda bolup geçýär. «Biz öňkümiz ýaly nebit we gaz ulanarys, emma esasy energiýa çeşmesi elektrik togy bolar» diýip, ýolbaşçy nygtady. HEA-nyň başlygynyň sözlerine görä, elektrikleşdirmegi ilerledýän üç sany ýagdaý bar, olar: EA üçin maglumatlary işlemek merkezleriniň sanynyň artmagy; ählumumy howa derejesiniň ýokarlanmagy bilen bagly serginledijileriň önümçiliginiň köpelmegi; elektrik ulaglary pudagynyň ösüşidir. Şunda ulaglar görülmedik depginde elektrikleşdirilýär. Halkara Energetika agentliginiň maglumatlaryna laýyklykda, Hytaýyň çäginden daşarda elektrik ulaglarynyň satuwy geçen ýylyň degişli döwründäkiden 60 göterim ýokarlandy.