Türkmenistanyň gurluşyk, senagat, himiýa we energetika pudaklaryny ösdürmäge bagyşlanan «CIET 2026» atly halkara maslahatyna we sergisine gatnaşmak üçin 60 ýurtdan 800-den gowrak wekil hasaba alyndy. Çäre 3–5-nji noýabrda Türkmenistanyň Söwda-senagat edarasynda geçiriler. Halkara forum döwlet edaralarynyň, halkara kompaniýalaryň, maýadarlaryň, önüm öndürijileriň, binagärleriň we degişli pudaklaryň hünärmenleriniň wekillerini bir ýere jemlär. Maslahatyň esasy strategik temasy «Innowasiýalar. Maýa goýumlary. Ösüş.» diýlip kesgitlenildi. Forumyň maksatnamasynda gurluşyk we senagat pudaklaryny ösdürmegiň geljegi, önümçilik kuwwatlyklaryny döwrebaplaşdyrmak, maýa goýumlaryny çekmek we häzirki zaman tehnologiýalaryny ornaşdyrmak meselelerine garalar. Energetika we himiýa pudaklaryna degişli meseleleriň çäklerinde önümçiligiň netijeliligini ýokarlandyrmak, çig maly çuňňur gaýtadan işlemek hem-de goşmaça gymmaty ýokary bolan önümleri öndürmek boýunça pikir alşylar. Gatnaşyjylar halkara inžiniring kompaniýalary we enjamlary üpjün edijiler bilen hyzmatdaşlygyň mümkinçiliklerini hem ara alyp maslahatlaşarlar. Infrastruktura bilen bagly meseleleriň hatarynda ýol ulgamlaryny ösdürmek, döwrebap gurluşyk materiallaryny ulanmak, binagärlik çözgütleri we durnukly şäherleri döretmek ýaly ugurlar bolar. Şeýle hem gurluşykda sanly gurallary ulanmak, infrastruktura desgalaryny dolandyrmagyň akylly tehnologiýalaryny ornaşdyrmak we hünärmenleri taýýarlamak meselelerine garalar. Döwlet-hususy hyzmatdaşlygyny ösdürmäge, telekeçiligi goldamaga hem-de infrastruktura we senagat taslamalaryna maýa goýumlaryny çekmäge aýratyn üns berler. Halkara serginiň çäklerinde kompaniýalar gurluşyk tehnikalaryny, senagat tehnologiýalaryny, materiallary we inženerçilik çözgütlerini görkezerler. Işewürlik duşuşyklarynyň dowamynda gatnaşyjylar maýa goýum taslamalaryny, enjamlary üpjün etmek meselelerini we geljekde bilelikde işlemegiň mümkinçiliklerini ara alyp maslahatlaşyp bilerler.