«Mançester Ýunaýted» topary baş tälimçi Ruben Amorimiň wezipesinden gidýändigini resmi taýdan yglan etdi. Portugaliýaly hünärmen 14 aýlyk işinden soňra wezipesinden çykaryldy. Ol topary Angliýanyň Premýer-ligasynyň (APL) 20 tapgyryndan soňra ýaryş jedwelinde altynjy orunda galdyrdy. Tälimçiniň klubuň başynda geçiren iň soňky duşuşygy 4-nji ýanwarda «Lids» bilen bolan oýun (1:1) boldy. Wagtlaýynça toparyň başyna ozal ýetginjekler topary bilen işlän Darren Fletçer bellendi. Futbolçylar onuň ýolbaşçylygynda 7-nji ýanwarda geçiriljek «Býornlä» garşy oýna çykarlar. Amorim 2024-nji ýylyň noýabryndan bäri klubda bolan döwründe 63 oýun geçirip, olarda 25 ýeňiş, 15 deňme-deňlik we 23 ýeňliş görkezdi. Onuň dolandyrmagynda topar Ýewropa ligasynyň finalyna çykmagy başardy, ýöne finalda «Tottenhemden» 0:1 hasabynda asgyn geldiler. Geçen möwsümi «MÝ» milli çempionatda 15-nji orunda tamamlapdy. The Athletic neşiriniň berýän maglumatyna görä, klub hünärmene 2027-nji ýyla çenli niýetlenen şertnamasynyň galan döwri üçin öwez tölegini tölemeli bolar. Daily Mail-iň anyklamagyna görä, tälimçiniň özüne tölenjek puluň mukdary 12 million funt-sterlinge (13,8 million ýewro) barabar bolar, onuň kömekçiler toparyna bolsa aýratyn töleg berler. Iňlis çempionatyna gelmezden ozal Amorim Lissabonyň «Sporting» toparyna ýolbaşçylyk edip, Portugaliýanyň çempiony bolupdy.